Description
Նկարագրութիւն
ՊԱՏԿԵՐ, ՊԱՏՈՒՄ, ՊԱՏՄՈՒԹԻՒՆի երկրորդ հատորը կը զբաղի Ի. դարու արեւմտահայ չորս վիպագիրներու՝ Զապէլ Եսայեանի, Գիրգոր Պըլտեանի, Շահան Շահնուրի եւ Զարեհ Որբունիի արտադրութեամբ, ու անոնց մօտ կը կարդայ նոյնպէս վերապրողի կերպարին երեւում-անհետացումը, մեռեալ վկային յարակարծիքները, վկայութիւն կոչուածին կատարեալ խնդրականացումը, եւ բոլորին մօտ անխուսափելիօրէն՝ պատկերին յափշտակիչ եւ յարակայ միջամտութիւնը։ Բայց մինչդեռ ֆրանսացի հեղինակներուն մօտ՝ վերապրողի եւ պատկերի շուրջ աշխատանքը կը կատարուէր բարեկամութեան ոլորտին մէջ, արեւմտահայ գրողներու պարագայի՝ կը կատարուի ատելութեան մթնոլորտի մը մէջ եւ ուրեմն մրցակցութիւններու լման շարքի մը ընդմէջէն. այր ու կնոջ միջեւ, գրականութեան եւ նկարչութեան միջեւ, վերապրողին եւ վկային միջեւ, նոյն սերունդին պատկանող գրողներու (եւ նկարիչներու) միջեւ, սերունդներուն միջեւ։ Այդ մրցակցութիւններուն կիզակէտին կը գտնուէր Յակոբ Օշական, ու այդ պատճառով՝ հատորը կը բացուի իր “Վկայութիւն մը” վերնագիրը կրող գրուածքին շուրջ վերլուծական ակնարկով մը:
