Անահիտ ԹՈՓՉՅԱՆՒ նոր վեպի հերոսուհուն մի տագնապ է համակել, համատեղ կյանքի քսանհինգերորդ տարում նա պարզում է, որ ամուսինը դավաճանել է՝ հենց առաջին օրերին... Պարզում է անսպասելի, զուտ կանացի բնազդով, «սրտի բանականությամբ», իսկ հետո՝ անժխտելի ապացույցներով։ Հերոսուհու ներաշխարհը տակնուվրա է եղել, լուրը ցնցել է նրան, ոչ մի կերպ չի կարող հաշտվել այս իրողության հետ։ Վրեժի ցանկությամբ լցված, իր հերթին, դավաճանում է ամուսնուն։ Թվում է՝ հաշիվը հավասարվեց... Սակայն հաջորդում է մի նոր մղձավանջ՝ նախորդից ավելի սոսկալի, դաժան փորձության առջև դնելով իրար սիրող, երկար տարիներ հաշտ ու անխռով ապրած ամուսիններին... Ի վերջո, հաղթում է բանականությունը։