Նոնա Ջոնսոնը` «Նյու Յորք Թայմս»-ի հանրաճանաչ և խոստումնալից հեղինակներից մեկը, կյանքի աշնան շեմին էր: Թվում էր, թե ամեն ինչ ուներ երջանիկ լինելու համար' հեղինակություն, փառք, հարստություն, բայց նրա հոգում ծվարել էր մի գաղտնիք անցյալից, որը հանգիստ չէր տալիս նրան: Մի ձայն աղաղակում էր անդադար' թույլ չտալով գնահատել կյանքի բարիքները և լիարժեք զգալ իրեն: Տարիներ շարունակ փորձել էր հաշտություն կնքել ոտնահարված, նսեմացված և կեղեքված զգացմունքներից առաջացած զայրույթի հետ, բայց այլևս անկարող էր: Հոգում բռնկված այդ խռովքը նրան դրդում է ինքնասպանության: Նա անզոր էր պայքարելու իրականության դեմ, բայց.... հանկարծ ամեն ինչ շրջվում է, մի ճիչ ստիպում է նրան սթափվել ու համարձակություն ունենալ դուրս գալու թաքստոցից և բարձրաձայնելու դաժան իրականության մասին, իրականություն, որի ակունքները տանում են նրան հետ' իր ծննդավայր Երևան: