Description
Նկարագրութիւն
Երկար ժամանակ կը պահանջէ ինքզինք ըլլալ։ «Ես կը գծեմ իմ ճամբան» կը ներկայացնէ մանուկի մը՝ դէպի չափահասութիւն երկարող ճամբուն վրայ հանդիպած խոչընդոտները եւ անոնց դիմաց իրեն նեցուկ կանգնող մեծ մայրը, ընկերները, գիրքերով ու մատիտներով շրջապատուած աշխարհը։ Այն պահերը, երբ կը գիրնանք, երբ մենք մեզ կը զգանք տարբեր ու առանձին, տարիները, երբ անվերջ հարցումներ կը հարցնենք մենք մեզի՝ մեր կեանքի անբաժանելի հատուածներն են։ Եւ կ՚ունենանք նաեւ շրջաններ, երբ ժամանակ կ՚անցընենք տարիքոտներու հետ, երբ անոնց հետ կը ճանչնանք բոլոր կենդանիները։
Ճամբաները, զորս կ՚անցնինք երբեմն մեծահասակներէն խնդրած օժանդակութեամբ, երբեմն ալ առանձինն յաղթահարելով դժուարութիւնները, իրականութեան մէջ այլազան ձեւերով փորձարկուած աճելու արկած մըն է։ Եկէ՛ք նման արկածի մը վկան դառնանք մանուկի մը աչքով… «Ես կը գծեմ իմ ճամբան» կը բանայ անզուգական աշխարհ մը, զոր իր գիրով ու գիծով ստեղծած է տաղանդաւոր նկարազարդող Հաթիէի Կարիփ։
